BUTUAN CITY – Hugot nang nakig-alayon ang Surigao del Norte Police Provincial Office ngadto sa 901st Brigade, Philippine Army alang sa nagpadayong hot pursuit operation sa kapulisan sa Sison, Surigao del Norte human gidagit sa gitu-uhang mga rebeldeng New People’s Army kon NPA ang usa ka pulis kaganinang buntag didto sa Purok 1, Brgy. San Isidro, sakop sa maong lungsod.
Naila ang biktimang si Police Staff Sergeant (PSSg) Restie Dandan, 42 anyos, minyo, residente sa Purok 5-A Brgy. San Isidro ug hepe sa Intelligence Section sa Sison Municipal Police Station.
Sa eksklusibong pakighinabi sa Bombo Radyo Butuan, gipadayag ni PMajor Renel Serrano, information officer sa Police Regional Office-13 nga desperadong lakang kini sa NPA.
Nasayran sa gihimong imbestigasyon nga padulong na unta sa iyang trabaho si Police Staff Sergeant (PSSg) Restie Dandan, 42 anyos, minyo, residente sa Purok 5-A Brgy. San Isidro apan usa ka kilometro na lang unta ang gilay-on niini dihang kini gipara ang gimanehuan niining moorsiklo sa usa ka grupo sa mga rebeldeng NPA.
Gawas sa mga midagit sa maong pulis, nakita usab sa mga nakasaksi nga duna’y blocking force ang mga rebelde aron maoy mu-agbat higayong duna’y muresponding mga ka-ubanan sa biktima.
