BUTUAN CITY – Karong Lunes na Pebrero 20, ipatuman sa Department of Education kon DepEd-Caraga ang pag-recite sa gi-usab nga pulong sa Panatang Makabayan.
Kini human hingpit nang nadawat sa ahensya kagahapon ang DepEd Memorandum No. 004 series of 2023 kondiin ang pulong nga nagdarasal, hulipan na sa pulong nga nananalangin.
Sa eksklusibong pakighinabi sa Bombo Radyo Butuan, gipasabot ni DepEd-Caraga spokesperson Dr. Pedro Tecson nga ang paghulip sa maong pulong gituyo aron ha-um kini sa uban pang mga sekta apil na sa gitu-uhan sa mga indigenous peoples.
Dugang ni Tecson, duna matud pa’y kunsultasyon nga gihimo ang mga tag-as nga DepEd officials pagpanguna ni Secretary ug Vice President Sara Duterte-Carpio uban ang mga language experts gikan sa Pambansang Samahan ng Linggwistika at Literaturang Pilipino ug Philippine Bible Society.
Bisan matud pa og sa atong paminaw wala kaayo’y kala-inan ang duha ka mga pulong, apan nagka-uyon ang mga eksperto nga mas ha-um sa tanang mga Pinoy sa bisan asang sekta, ang paggamit sa pulong nga nananalangin.
