BUTUAN CITY – Mitambag ang usa ka Cum Laude graduate sa mga magtutungha nga mag-focus sa ilang pagtoon ug kanunay nga musalig sa Ginoo aron kini magmalampuson sa ilang pag-eskwela.
Kini ang pamahayag ni Anna Maria Christine Pesaro nga taga Libertad, Butuan City ug migradwar nga Cum Laude sa kursong Bachelor of Science in Business Administration major in Human Resource Management sa usa ka pribadong unibersidad ning dakbayan.
Sigon ni Tesaro sa eksklusibong pakighinabi ning sibyahan, dili malikayan ang kalisud nga masinatian diha sa pagtungha hinungdang kinahanglan gayud ug igong determinasyun ilabina sa iyang sitwasyun nga usa ka iskolar sa nasangpit nga tunghaan.
Napili matud pa niya ang maong kurso tungod sa pagtoo nga makapalambo kini sa iyang skills. Dugang tambag nalang niini sa mga magtutungha nga likayan ang bisyu, ug epahinungod ang pagtoon sa ilang mga ginikanan.
Sa karun, plano ni Tesaro nga mo-apply sa gobyernong opisina dungan sa panghinaot nga kini madawat.
