BUTUAN CITY – Padayon ang gihimong damage assessment sa Office of Civil Defense (OCD) XII sa mga lugar sa Region 12 nga naapektuhan sa kusog nga ulan nga nagdala ug flash flood ug landslide.
Sigon ni OCD 12 Information Officer Anne Santos, duna’y mga pagbaha sa Barangay Landan ug Maligo sa lungsod sa Polomolok, South Cotabato diin mibuswak ang mga suba ug kanal hinungdan nga pipila ka mga pamilya ang temporaryong gipapahawa ug gipahimutang sa mga evacuation centers.
Samtang, nakuhaan og video sa Alamada, Cotabato ang pipila ka estudyante nga gisakay sa kabaw aron makalabang sa kusog nga suba.
Duna’y natalang landslide sa mga pangpang sa South Cotabato nga nakaapekto sa pipila ka sakyanan ug kabtangan, apan wala’ ma’y gikatahong namatay o grabe nga nasamdan.
Padayon ang monitoring sa OCD XII sa kahimtang sa panahon ug lebel sa tubig sa mga suba.
Gipasidan-an usab ang publiko nga magpabiling alerto, likayan ang mga delikadong lugar, ug mosunod sa abiso sa lokal nga pangagamhanan alang sa kaluwasan.
