BUTUAN CITY- Gibutang sa home detention sa mga awtoridad sa Estados Unidos ang Filipina nurse nga si Marizel Yukee human kining maakusahan sa pagkalambigit sa usa ka giingong healthcare fraud scheme nga nagkantidad og dul-an $1 bilyon.
Si Yukee, 49 anyos ug residente sa Las Vegas, gidakop sa Houston, Texas, human magpagula og warrant ang federal court niadtong Hunyo 18. Nag-atubang kini og mga kaso nga may kalabotan sa healthcare fraud, money laundering, ug pagdawat og ilegal nga komisyon alang sa mga referral sa pasyente. Sumala sa mga awtoridad, giingong nangulo kini sa usa ka $906-milyon nga anomalya nga naglambigit sa Medicare ug TRICARE, diin kapin $297 milyon ang nabayad sa maong mga programa.
Nakumpiska usab gikan kaniya ang mga asset nga nagkantidad og gibana-banang $5.2 milyon, lakip ang kuwarta, mahalon nga sakyanan ug mga alahas. Giingon usab nga bahin sa iyang kita ang gigamit sa pagtukod og usa ka beach resort nga nagkantidad og $4.6 milyon sa Santa Ana. Samtang gilimod usab ni Yukee ang mga pasangil ug mipasaka og not guilty plea sa tanang kaso.
Bisan pa niini, gitugotan kining makagawas samtang naghulat sa pagtaral human makapiyansa og $600,000 secured bond ug $400,000 unsecured bond. Ubos sa mga kondisyon sa korte, limitado ang iyang mga lihok, kinahanglang magsul-ob og GPS ankle monitor, ug gimando usab nga i-surrender ang iyang pasaporte.
