BUTUAN CITY – Nag-viral karon online o sa social media ang usa ka College student nga lalaki sa General Santos City kon Gensan tungod sa pagsakay na lang niini sa ilang binuhing kabayo tungod sa kamahal sa plitehan sa ilang sakyan aron lang maka-abot sa eskwelahan.
Misamot karon ang bonding nila John Jeric, usa ka first year college student ug sa kabayo nga si Rebecca, karong mao na kini ang iyang sakyan padulong sa eskwelahan ug pa-uli sa ilang panimalay tungod sa dili na mnatud pa, ma-afford nga presyo sa gasolina kung mag-motorsiklo.
Gipasabot ni Jeric nga tungod sa nagpadayon nga pagsaka sa presyo sa lana, ang pagbiyahe sakay sa kabayo mas barato kay sa pagbayad sa nagkataas nga plete sa traysikol.
Gawas niini, mas sayon ra usab ang pag-atiman sa hayop tungod kay sagbot ug tubig lang ang gikinahanglan niini.
Nagdako matud pa siya sa bukid sa Sultan Kudarat ug didto siya nakakat-on pagsakay sa kabayo sa bata pa hangtud nga hamtong na siya.
Ang mamugnaong pagpili ni Jeric nakalingaw sa mga motorista ug nakahatag og inspirasyon sa daghan isip simbolo sa kalig-on taliwala sa mga hagit sa ekonomiya.
