BUTUAN CITY – Gitaho sa Philippine Statistics Authority Caraga atol sa 2025 Report on the Economic Performance of Caraga Region nga misaka sa 5.7 porsiento ang ekonomiya sa rehiyon sa Caraga niadtong tuig 2025.
Kini mas paspas pa kung ikumpara sa nasudnong average nga anaa sa 4.4 porsiento.
Sumala sa taho ni PSA-Caraga OIC Regional Director Guillermo Lipio Jr. nga nasakmit usab sa Caraga ang ikaduhang labing kusog nga rehiyon sa tibuok nasud sa economic performance.
Nanguna ang sektor sa serbisyo sa pagsaka sa ekonomiya sa Caraga nga adunay pinakadakong kontribusyon sa Gross Regional Domestic Product o GRDP.
Sa mga major industries, ang Services maoy adunay pinakataas nga pagtubo nga mokabat sa 7.2 percent, gisundan sa Industry nga may 4.8 percent ug Agriculture, Forestry, and Fisheries nga may 0.4 percent.
Ang Services usab ang nagkupot sa pinakadakong bahin sa GRDP nga 57.0 percent o nagkantidad og 218.66 bilyones pesos.
Nagsunod niini ang industriya nga adunay 32.9 percent o 126.37 bilyones pesos samtang ang Agriculture, Forestry, and Fisheries nakatampo og 10.1 percent o 38.69 bilyones pesos.
Sumala sa opisyal nga nagpakita kini sa nagkadako nga papel sa sektor sa serbisyo sa paghulma sa ekonomiya sa Caraga, uban sa suporta sa industriya ug agrikultura.
Samtang, misaka usab ang per capita GRDP sa rehiyon ngadto sa 129,925 pesos sa 2025, gikan sa 124,236 pesos sa 2024.
