BUTUAN CITY – Daw eksena sa pelikula ang nahimong ginukdanay ug pinusilay ning mi-aging alas-otso gabii sa Brgy. Sanghan, Cabadbaran City, lalawigan sa Agusan del Norte, atol sa ilusad unta nga drug-bust operation kansa wala madayon human naka-detect ang gibana-banang upat ka mga drug personalities nga sakay sa usa ka Toyota Innova.
Sa pag-asuy ni Julius Moral nga taga-Cabadbaran City ug apil unta sa musaksi sa operasyon, human sa gihimong briefing kanila sa mga sakop sa Cabadbaran City Police Station, gisugdan gilayon ang operasyon kondiin nakaplastar na ang poseur-buyer ug ang alpha sa dapit diin himuon unta ang transaksyon.
Apan naka-detect ang mga drug personalities nga duna’y mga pulis dihang nakita nila ang patrol car rason nga ila kining gipabuthan ug dinhi na natigayon ang ginukdanay ug pinusilay kondiin mi-abot na sila sa may Brgy Sto. Niño ning siyudad sa Butuan ug dinhi na gi-abandona sa mga sakay ang ilang sakyanan ug midagan padulong sa basakan.
Dugang pa ni Moral, mukabat sa 75-mil pisos nga ginadiling druga unta ang subject sa operasyon nga gila-umang mas mulabaw pa human gidugangan ang gi-order kunuhay sa poseur buyer.
Gisuhid matud pa sa kapulisan ang maong lugar hangtud sa alas-dose ang takna sa gabii apan wala gayod makita ang mga drug personalities hangtud nga mibiya sila pasado alas-12 na sa tungang gabii.
