BUTUAN CITY – Malampusong nalusad kaganinang buntag sa Florencio R. kon FR Sibayan Central Elementary School sa may Brgy. Baan Km. 3 ning syudad sa Butuan ang pagpatuman sa Catch-up Fridays pinaagi sa Drop Everything and Read kon DEAR day sa Department of Education kon DepEd.
Usa kini ka senemanang activity nga himuon matag-adlaw’ng Biernes karong tuiga base sa memorandum nga gipirmahan ni DepEd Undersecretary Gina Gonong niadtong Enero 10 nga nagtumong paghatag sa mga learners og higayon nga mulambigit sa kina-ugalingong pagbasa sa ilang pinili nga libro.
Sa eksklusibong pakighinabi sa Bombo Radyo Butuan, gipadayag ni school principal Jovy Gregorio nga pinaagi niini, matabangan ang mga magtutungha nga maglisod pa sa pagbasa ug pagsabot sa ilang gibasa.
Dugay na matud pa kining ginahimo sa DepEd apan karon, mas kinahanglan matud pa kining apason kon i-catch up human nabiyaan ang face-to-face learning angmga bata tungod sa pag-igo sa COVID-19 pandemic.
Target sa maong programa nga adiser musaka sa laing ang-ang sa ilang pagtungha, masiguro na nga sila hingpit nang makabasa ug wala usa’y maka-graduate nga dili makamaong mubasa.
Dako ang pagpasalamat sa school principal tungod sa mga stakeholders nga mitabang kanila aron dunay igong mga reading materials nga mabasa ang mga bata gawas sa mga librong gikan sa ilang balay nga maoy ganahan nilang makat-unan sa pagbasa.
Alayon niini, nanawagan ang school principal niadtong mga indibidwal o kaha mga grupong gustong makighi-usa sa programa sa DepEd nga mudonar sa ilang mga pangbata nga reading materials aron magamit nila kada-Biyernes.
