BUTUAN CITY – Gikumpirma sa Department of Justice (DOJ) nga nagsumite na sila og hangyu para sa Red Notice sa Interpol batuk kang Sen. Ronald “Bato” dela Rosa.
Kini ang kabahin sa legal process aron ipatuman ang arrest warrant nga gi-isyu sa International Criminal Court kon ICC mahitungod sa mga kasong crimes against humanity nga dunay kalabutan sa ‘war on drugs’ campaign sa kanhe administrasyon.
Sigon sa DOJ nga gikonsidera nang “fugitive from justice” si Dela Rosa ug gitahasan na ang mga law enforcement agencies sama sa Philippine National Police (PNP) ug National Bureau of Investigation (NBI) nga ipatuman ang pag-aresto.
Gipasabot pa sa ahensya nga ang Red Notice dili mismo warrant of arrest, kundi usa ka international alert aron matultulan ug posibleng maaresto ang usa ka tawong dunay giatubang nga bug-at nga kaso.
Nagpasidaan usab ang DOJ batuk sa bisan kinsang mosulay sa pagtabang sa pagtago-tago sa senador.
Mahinumdumang migawas na ang desisyon sa Korte Suprema nga nagbasura sa gidusong petisyong temporary restraining order (TRO) sa kampo sa senador, nga nagtumong nga dili tugutan ang pag-aresto kaniya sa ICC.
Sa kasamtangan, wala pa matumbok ang nahimutangan sa senador, human nga mibiya sa premises sa Senado niadtong Mayo 14 sa kaadlawon human ang kagubot sa Senado niadtong Mayo 13.
