BUTUAN CITY- Naglatid ang Department of Health kon DOH ug Philippine Health Insurance Corporation PhilHealth og 16 ka bulan nga reform plan aron mapalig-on ang PhilHealth RISE30 Mission ug mapaayo ang access, equity ug efficiency sa paghatag og Universal Health Care sa nasud.
Kapin 100 ka representante gikan sa development partners, financial institutions, academe, civil society ug nagkalain-laing ahensya sa gobyerno mitambong sa 2026 PhilHealth Partners’ Forum sa Asian Development Bank Headquarters aron ipahiuyon ang mga resources ug technical expertise sa mga reporma.
Gipasiugda ni DOH Acting Secretary Edwin Mercado ang plano nga maghimo og separado nga division alang sa hospital operations aron mas maayong matimbang ang supply ug panginahanglan sa serbisyo panglawas, lakip ang mas klarong financial transparency ug koordinasyon tali sa public ug private hospitals.
Samtang, gipahayag ni acting PhilHealth President ug CEO Beverly Lorraine Ho nga palig-onon sa PhilHealth ang upfront inpatient payments pinaagi sa global budget ug diagnosis-related groups, uban sa milestone-based incentives aron dili lamang access sa serbisyo ang bayran kundili usab ang kalidad ug resulta sa pag-atiman sa mga pasyente.
