BUTUAN CITY – Gibasura sa Commission on Elections kon COMELEC ang disqualification case batuk kang Deputy House Speaker Rep. Prospero Pichay Jr. Sa Surigao del Sur alang sa iyang congressional bid sa umalabot nga Mayo 9 nga local ug national elections.
Sa resolution nga gi-isyu niadtong Pebrero 15 ug gipagawas ngadto sa media kagahapon, ang kanhi First Division sa COMELEC, mi-dismiss sa petisyon nga giduso niadtong Nobyembre ning mi-aging tuig nga nagpakansela sa Certificate of Candidacy kon COC ni Pichay pinaagi sa iyang ka-atbang nga si Construction Workers’ Solidarity Party-list Rep. Romeo Momo.
Sa resolution, gi-dismiss sa poll body ang petisyon ni Momo kansa nagbutang-butang kang Pichay nga dili matud pa kwalipikado nga subling magpapili, sa basehang nakonbikto na kini sa Ombudsman sa kasong gikutay atol sa iyang termino dihang siya pa ang chairman sa Local Water Utilities Administration kon LWUA panahon ni kanhi Pangulong Gloria Macapagal-Arroyo.
Nakalatid pa sa resolusyon sa COMELEC nga katungdanan nila nga istriktong sundon ang Rule III Section 7 sa mga patakaran sa Ombudsman tungod sa extraordinary nature sa mga executions pending sa apela kansa maoy nagpukaw sa palisiya kalabot sa finality sa mga paghukom sama sa pagkonbikto.
