BUTUAN CITY- Nagpahayag og dakong kasubo ug pagbangotan ang Department of Education kon DepEd sa pamilya sa Grade 4 nga estudyante sa Hugo Perez Elementary School-Annex sa Trece Martires City, Cavite kinsa namatay human sa usa ka routine deworming activity nga gihimo niadtong Hulyo 2 uban sa City Health Office.
Sumala sa inisyal nga medical findings, ang hinungdan sa kamatayon gilangkuban sa usa ka impeksiyon nga misangpot sa septic shock, ug wala pa kini opisyal nga giingong tungod sa deworming.
Gani, nakasinati og dili maayong pamati ang pipila ka mga estudyante human sa aktibidad. Gipasalig usab sa DepEd ang paghatag og angay nga suporta sa nabiling pamilya, samtang nagtinabangay ang mga health authorities sa imbestigasyon ug pagrepaso sa health ug safety protocols aron masiguro ang kaluwasan sa tanang mga estudyante.
Giawhag usab sa ahensya ang publiko nga mosalig lamang sa beripikadong impormasyon gikan sa mga eksperto sa panglawas samtang nagpadayon ang imbestigasyon.
