BUTUAN CITY – Gipagawas na sa Department of Energy kon DOE ang mga bag-ong sumbanan aron sumpuon ang hoarding kon pagtago sa mga oil companies sa ilang baligyang mga produktong petrolyo subay na sa nagtunhay nga state of national energy emergency karon sa nasud.
Apil sa ilang gipatuman ang paglimita una sa pagpalit og petrolyo ingon man ang mas hugot nga regulasyon sa mga container-based transactions ug ang pagpahugot sa pagbantay sa inventories ug distribusyon sa lana gamit ang emergency petroleum monitoring system.
Klaro usab nga gihikyad sa ahensya ang pagpatuman sa balaud apil na ang buhis ug ang pag-isyu og show cause order batuk sa mga gibadlong nga negosyante.
Aron mapakusgan ang kampanya, gibuhi karon sa DOE ang Joint Task Force Against Hoarding kauban ang Department of Justice aron ma-aksyunan gilayon ug mapasakaan og kasong administratibo ug kriminal ang mga mapamatud-ang nanago og supply.
