BUTUAN CITY – Miabot sa 10 katawo ang namatay human matabunan sa landslide ang usa ka umahan sa Sitio Fundao, Barangay Poblacion, Malapatan, Sarangani niadtong Biyernes sa buntag.
Sigon ni Malapatan Municipal Disaster Risk Reduction and Management Office (MDRRMO) Incident Commander ug Head Mark Christopher Quiño, nahitabo ang landslide sa usa ka umahan anaa sa kapin o kulang 500 metros ang kalayo gikan sa mismong komunidad sa Sitio Fundao.
Sumala sa MDRRMO, duha ka pamilya ang nagpuyo sa lugar lakip na ang lima ka hamtong, lima ka bata, ug dunay senior citizen. Padayon ang search and rescue operations sa mga awtoridad aron makit-an pa ang nawala apan lisud kini alang sa mga rescuers tungod kay mamahimo lang maabot ang lugar pinaagi sa pagbaktas.
Nakig-alayon na usab ang MDRRMO sa Philippine National Police, Armed Forces of the Philippines, at Bureau of Fire Protection para sa patuloy na operasyon sa lugar.
Gi-awhag usab ni Malapatan Mayor Jun Sumbo ang mga residente nga nagpuyo sa landslide-prone nga mga lugar nga mobakwit dayon ug mosunod sa mga pahimangno sa lokal nga kagamhanan aron malikayan ang dugang nga mga biktima, ilabina nga nagpadayon ang dili maayong kondisyon sa panahon ug posible pang adunay mosunod nga landslide.
Muabot na sa 115 kabalayan gikan sa duha ka barangay ang naapektuhan sa padayon nga pag-ulan ug flash flood.
Gihikling na ang mga residente sa mga evacuation center diin laumang magpabilin sila samtang dili pa luwas ang ilang mga komunidad.
Nanawagan usab ang mga lokal nga opisyal og tabang ilabina sa food packs ug limpyo nga mainom nga tubig tungod kay kontaminado na ang kadaghanan sa ilang mga gikuhaan sa tubig.
Samtang misaka usab sa 7 ang natalang patay samtang 4 ang gipangita human natabunan sa dakong landslide SA Barangay Ngingir, lungsod sa Calanogas, Lanao del Sur kagahapon sa kaadlawon.
Base sa pasi-unang imbestigasyon, midahili ang dakong parte sa yuta tungod sa walay hunong nga pag-ulan nga mitabon sa mga residente nga anaa sa maong lugar.
Padayon ang search, rescue, ug retrieval operations sa Calanogas Municipal Police Station kauban ang Municipal Disaster Risk Reduction and Management Office (MDRRMO), Bureau of Fire Protection (BFP), lokal nga kagamhanan, mga opisyal sa barangay, ug mga volunteer rescuers.
Lakip sa mga na-missing sila Mujahid Abdulmajid, Mobairah Abdulrashid, Norhasan Abdulrashid, Lilikan Arab, Norlin Ali, ug Norhanima Ali.
