BUTUAN CITY – Nag-adjourn kaganina ang Senado nga wala’y ka-usaban sa liderato human nga nagpabiling Senate President si Senador Alan Peter Cayetano taliwa sa una nang mga hugon-hugon nga hulipan na siya tungod sa natigayong tensyon niadtong Mayo 13 sa gabii.
Nag-adjourn ang sesyon sa Senado pasado alas-4:40 sa hapon human nag-convene isip impeachment court alang sa pagtaral kang Vice President Sara Duterte ug pag-apruba sa mga bag-ong committee chairmanships uban sa pipila ka mga kabag-uhan.
Si Senadora Loren Legarda mao ang chairman sa Senate Committee on Culture and the Arts ingon man Basic Education Committee samtang si Senadora Pia Cayetano mao ang magkupot sa Senate Committee on Ways and Means; Committee on Sustainable Development Goals ug Committee on Energy.
Samtang si Senador Christopher ‘Bong’ Go mao ang magkupot sa Senate Committee on Health ug Committee on Sports samtang ang Senate Committee on Higher, Technical and Vocational Education kuptan ni Senador Joel Villanueva.
Kuptan usab ni Senador Jinggoy Estrada ang Committee on National Defense and Security ug Committee on Games and Amusements, samtang si Senador Robin Padilla mao ang magkupot sa Committee on Public Information and Mass Media ug Committee on Cultural Communities and Muslim Affairs ug ang Committee on Public Services, kuptan ni Senador Rodante Marcoleta.
