BUTUAN CITY – Plano sa Commission on Elections kon COMELEC nga magbutang og usa ka voting precinct sa komunidad sa Socorro Bayanihan Services Inc. kon SBSI sa Sitio Kapihan, Barangay Sering, lungsod sa Socorro, Surigao del Norte alang sa May 2025 midterm elections.
Gipadayag kini ni Commission on Elections kon COMELEC chairman George Erwin Garcia atol sa pagpanguna niya sa gihimong satellite voter’s registration and education sa nasangpit nga lugar.
Sigon sa opisyal, duna’y kapin sa 2-mil ka mga botante ang maong komunidad kansa igo na aron dili na mubiyahe pa sa sentrong bahin sa lungsod ang mga membro sa gibansagang kulto aron lang mubotar.
Gipadayag pa ni Atty. Garcia nga ang ilang plano dili supak sa kamanduan sa Department of Environment and Natural Resources (DENR) alang sa pag- relocate sa mga residente tungod kay ang ila lang, masiguro nga ang tanang kwalipikadong botante, makabotar.
Gawas pa, kinahanglang mabati usab sa mga membro sa komunidad nga naka-abot kanila ang serbisyo sa gobyerno.
Samtang dakong kalipay ang gibati sa katawhan sa lungsod sa Socorro ilabina ni Mayor Riza Rafonselle Timcang sa gihimong satellite voters’ registration and education sa COMELEC sa ilang luungsod tungod kay timaan lang matud pa kini nga padayon gihapon ang maong poll body pagbira pataas sa morale sa grassroots society, partikular na sa katawhan sa Sitio Kapihan sa Brgy. Sering.
Nanghinaut ang mayor nga mao na kini ang sinugdanan aron masabtan sa katawhan sa maong komunidad ang tinuod nga serbisyo sa gobyerno.
