BUTUAN CITY – Kumbinsido si P/ Sr. Insp. Joselito Delos Santos, Hepe sa Lapaz, Agusan Del Sur nga tulis ang motibo sa pagpusil patay sa usa ka collector sa bangko kagahapon sa mga alas 10:00 sa buntag sa may Purok 8 Sitio Landing, Barangay Panagangan sa maong lungsod.
Giila sa Hepe ang biktima nga si Jay Stephen Ferial Esteban, 26-anyos, olitawo nga taga Cantilan, Surigao Del Sur ug collector agent sa Cantilan Bank.
Sa nakuha nilang impormasyon, nagsumikad ang biktima sa Barangay Waloe sakop sa Loreto diin kinahanglan kining mo-agi sa maong dapit adiser maka-abot sa iya untang adtoan nga Barangay Magaud, sa lungsod sa Loreto.
Posibleng gi-atangan kini sa mga suspek adiser gipusil. Nagtoo ang hepe nga tulis ang maong hitabo human nawala ang usa ka backpack ug usa ka sling bag sa biktima samtang tungod sa pagdali-dali sa mga suspetsado, wala na nakuha niini ang duha ka cellphone ug pitaka nga dunay sulod nga 700 pesos cash.
Samtang wala na gikumpirma sa kadumalahan sa maong bangko kung duna bay sulod sa duha ka bag nga gidala sa mga biktima. Nakahiagum ang biktima ug samad pinusilan sa kilid sa dughan og sa walang bukton nga nilapos sa dughan.
Sa ilang pakisusi, usa ka bata ang unang nakakita sa hitabo diin gibangon pa niini ang single motor sa pagtoong nadisgrasya lang ang biktima.
Nakita usab sa usa ka magtutudlo nga dunay basyo sa bala og usa ka buhing bala sa wala pa matinong klase sa armas hinungdang nagduda na kini nga gipusil ang drayber rasong misumbong kini sa Barangay Official nga daling mipaabot usab ngadto sa kapulisan.
Sa karun padayon pa ang imbestigasyon sa hitabon aron mailhan ug masakpan ang mga responsable.
