BUTUAN CITY – Subay sa paghandom karong adlawa sa ika-500 ka tuig nga unang misa dinhi sa Pilipinas, subling gihingusgan ni Butuanon historian Fr. Joesilo Amalla nga dinhi sa Mazaua, Butuan City kini gipahigayon ug dili sa Limasawa, Leyte.
Madumdumang gihimo ang unang misa dihang nangabot ang mga Espanyol pagpanguna sa Portuguese explorer nga maoy nanguna sa Spanish Expedition sa East Indies nga si Ferdinand Magellan.
Sa eksklusibong pakighinabi sa Bombo Radyo Butuan, gipadayag ni Fr. Amalla nga ipadayon sa ilang grupo ang pakigbisog aron ma-usab ang matud pa, kasaysayan kalabot sa unang misa tungod sa kadaghan sa ilang gikuptang mga dokumento isip ebidensya.
Apil niini ang primary ug secondary sources ingon man ang mga carthographic ug scientific maps kondiin ang pipila pa sa ilang mga ebidensya naggikan pa sa Espanya.
Gidugang pa ni Fr. Amalla nga dinhi sa Butuan natawo ang Pilipinas tungod sa pag-abot sa mga Espanyol sa Mazaua diin duna’y dakong katuyuan ang grupo ni Magellan.
Human ang pila ka mga adlaw ug mga buwan nga paglawig sa kadagatan, natunong matud pa nga sa pag-abot sa Mazaua mao ang Easter Sunday rason sa ilang pagmisa kansa angayang ipasalamat sa tanang mga Pinoy tungod kay talagsaon ra kaayo nga maka-abot kita sa maong kasa-ulugan kansa gikonsidera niyang dakong gasa ug grasya gikan sa Kahitas-an.
