BUTUAN CITY- Nanawagan si Kalookan Bishop Pablo Virgilio Cardinal David sa mga magtutuo nga mag-ampo alang sa kalinaw sa Middle East samtang nagbantay ug nagsimba sa Kabanal-banalang Sakramento karong Huwebes Santo.
Gibuhat niini ang panawagan sa panahon sa pagbalhin sa Sakramento human sa Misa sa Katapusang Panihapon sa San Roque Cathedral sa Caloocan.
Gi-awhag sa Kardinal ang mga magtutuo sa hilum nga pag-ampo alang sa mga naapektuhan sa giyera ug sa ubang lugar nga nag-antos sa kasamok.
Matod pa niya, angay pangayo-on sa Ginoo nga pukawon ang konsensya sa mga lider sa kalibutan aron protektahan ang mga sibilyan ug tambalan ang mga na-angol sa giyera, uban sa panawagan nga magmadaugon ang kalinaw.
Sumala sa mga taho, kapin sa 3,000 na ang namatay sa nagpadayon nga giyera sa rehiyon nga nagsugod human sa opensiba sa Estados Unidos ug Israel batok sa Iran niadtong Pebrero 28.
