BUTUAN CITY- Mipasidaan ang World Health Organization kon WHO nga bisan pa sa dagkong kalamboan sa siyensya batok sa kanser, daghang pasyente gihapon sa tibuok kalibotan ang nagpabiling nag-atubang og grabe nga pisikal, emosyonal, ug pinansyal nga epekto tungod sa dili patas nga access sa paglikay, pagdayagnos, pagtambal, ug pag-atiman.
Sumala sa WHO, usa sa matag lima ka tawo posibleng makasinati og kanser sa ilang kinabuhi, samtang gibanabana nga adunay 20.6 milyon ka kaso ug 10 milyon ka kamatayon matag tuig, diin gilaumang mosaka ngadto sa dul-an 35 milyon ka kaso sa 2050. Mas dako ang kahimtang sa mga kabos nga nasod diin limitado ang access sa mga tambal ug pasilidad, hinungdan nga mas ubos ang survival rate kumpara sa adunahang mga nasod.
Gipasiugda usab sa taho ang kalisod sa mga pamilya tungod sa gasto sa pagtambal, mental health challenges, ug stigma sa kanser, apan nagpabiling adunay paglaom pinaagi sa pagkunhod sa paggamit og tabako, mga programa batok sa cervical cancer, ug pagpugong sa mga risk factor sama sa dili hustong estilo sa kinabuhi, alkohol, impeksyon, ug sobrang timbang. Nanawagan usab ang WHO sa mga gobyerno nga palig-onon ang serbisyo sa kanser gikan sa pagpugong, sayong pagdayagnos, hangtod sa pagtambal ug pag-atiman sa mga pasyente.
