BUTUAN CITY – Nagpadayon ang Brigada Eskwela sa Agusan National High School taliwa pa man sa pag-abli na sa Oplan Balik Eskwela program kagahapong adlawa.
Sa eksklusibong pakighinabi sa Bombo Radyo Butuan, gipadayag ni Agusan National High School principal Dennis Roa, tumong niini ang paghimo og mekanismo aron dili maghuot ang mga eskwelahan sa pagbukas na sa school year 2022-2023 karong Agusto 22.
Gipasabot sa opisyal nga ang kanhi grade 7 nga mga estudyante nga grade 8 na karon ug pataas pa nga grade level, otomatiko na nga enrolled alang karon nga school year rason nga dili na nila kinahanglang mu-adto pa sa ilang eskwelahan aron lang magpa-enrol.
Kung duna matud pa’y mga estudyanteng mudalikyat sa ilang tunghaan, kana aron pagtan-aw lang kung unsa ang ilang section aron muderetso na lang sila sa ilang classroom sa unang adlaw sa klase.
Dugang pa ni Roa, ang mga volunteers nga nanguha sa ilang eskwelahan sukad pa kaganinang sayo sa buntag, nakatutok lamang matud pa sa preparasyon sa mga lawak-tunghaan aron sa mismong unang adlaw sa klase, diretso na sila sa pagklase ug dili na manghinlo pa.
Gipasabot pa ni principal Roa nga ang Oplan Balik Eskwela mao ang katapusang kalihukan sa Brigada Eskwela kondiin nakatutok na lang sa mga classrooms ang preparasyon ug dili na sa kinatibuk-ang school premises.
Gidugang pa sa opisyal nga sugod ning adlawa, nag-report na sa ilang trabaho ang tanang mga magtutudlo aron ma-andam na ang ilang mga lawak-tunghaan alang sa pagsugod na sa klase sunod Lunes, Agusto 22.
