BUTUAN CITY – Ang hugot nga paningkamot og kapursigido sa kinabuhi maoy hinagiban sa kalampusan sa usa ka Bombo volunteer kinsa migradwar nga cum laude taliwa pa man sa kalisdanan sa kinabuhi.
Dako ang pagpasalamat sa 21-anyos nga dalagang si Expher Angeli Ayaton ngadto sa tanang mga tawong mitabang sa ilang kalisdanan aron lang iyang matapos ang kursong Bachelor of Arts major in Guidance and Counseling sa Father Saturnino Urios University kon FSUU ning siyudad sa Butuan.
Sa pakighinabi ning sibyahan, gibutyag ni Expher nga gamay pa lang siya duna na siya’y gugma sa pagsibya tungod kay volunteer usab ning sibyahan ang iyang inahang si Angel Ayaton.
Wala na’y klarong trabaho ang iyang inahan dihang nagtungha na siya sa kolehiyo og tungod kay maayo man ang iyang mga grado, hinungdan nga gipa-utang sila sa iyang maninoy aron lang makatapos sa iyang pagtungha.
Karon, nag-apply na pagka-news writer si Ayaton og naghikay na sa mga gikinahanglang dokumento aron mahatagan na og katumanan ang iyang dugay nang damgo nga mamahimong kabahin sa pamilya sa Bombo Radyo. (Beth Ruiz)
