BUTUAN CITY- Gipamatud-an na usab sa TV host ug aktor nga si Billy Crawford ang iyang talagsaong talento sa internasyonal nga entablado human kining mingdaog isip kampeon sa Season 9 Mask Singer France niadtong Hunyo 28. Nadaug niya ang grand finale pinaagi sa iyang makabungog nga pasundayag sa kantang “Beat It” ni Michael Jackson isip karakter nga “L’Ane” (donkey), kung asa gitago ang iyang tinuod nga identidad sulod sa usa ka bulan.
Nakadani usab kini sa mga manan-aw sa France pinaagi sa iyang mga pasundayag sa French ug English nga mga kanta. Sa iyang mensahe, nagpasalamat si Crawford sa production team ug mipadayag nga iyang gipili ang karakter alang sa iyang anak nga si Amari. Gisundan kini sa daghang pagbati gikan sa iyang mga fans ug mga personalidad sa industriya.
Kahinumduman nga kaniadto nahimo kining host sa Masked Singer Pilipinas ug nakadaog usab sa French version sa Dancing with the Stars niadtong 2022, samtang ang iyang hit nga “Trackin’” niadtong 2002 nakatabang sa pagpalapad sa iyang kasikatan sa France.
