BUTUAN CITY – Gipasakaan na og mga kasong murder ug child exploitation ang bayot nga suspek sa pagpatay sa 15-anyos nga dalagitang iyang higala didto sa Cabadbaran City, Agusan del Norte.
Kini human natumbok nga siya ang mipatay sa biktimang si Bea More, residente sa Brgy. Pitogo, Jabonga, Agusan del Norte kinsa napalgan na lang nga wal na’y kinabuhi sa minteryong bahin sa Brgy. 12 sa maong siyudad.
Aminado si PLCol Solomon Alemania – hepe sa Cabadbaran City Police Station, taas-taas ang dagan sa ilang gihimong imbestigasyon adiser natumbok nga ang bayot ra diay ang mihimo sa ngilngig nga kremin.
Sigon ni Col. Alemania sa eksklusibong pakighinabi sa Bombo Radyo Butuan, duha ka adlaw nga na-missing ang biktima niadtong Hunyo 6 adlaw’ng Sabado ug napalgan lang sa mga tawong muduaw unta sa lubong sa ilang kabanay pagka-Lunes.
Apil matud pa ang suspek nga si Racman Panonde, 22-anyos, residente sa maong siyudad sa mga persons of interest nga apil sa ilang gi-imbestigahan kondiin daghan pa kini og gitudlong suspek sa kremin.
Kagahapon lang nila natumbok nga kini ang mipatay sa dagan na sa ilang gihimong re-enactment gikan sa katapusang mga oras sa ilang panag-uban hangtud nga napalgan na ang patay’ng lawas sa biktima.
Dinhi na matud pa gi-angkon sa suspek nga nagduda siyang ang iyang karelasyong 15-anyos nga bayong-bayong, karelasyon usab sa iyang higalang biktima.
Ang kahadlok matud pa nga mawala kaniya ang iyang hinigugma ang nagtukmod kaniya nga himuon ang ngilngig nga kremin.
Samtang gipanghimakak usab niini ang alegasyong iyang gibugaw ang uban pang mga dalagitang iyang higala taliwa nga mihatag na og testimoniya ang iyang mga nabiktima ngadto sa kapulisan kansa maoy gamitong ebidensya sa iyang mga dautang binuhatan.
Base sa Facebook account sa suspek, duna pa kini posts nga nanawagang ipahibalo kanilang magbarkada ang makakita sa biktima uban pa ang pagkaguol kunuhay niya nga wala na kini magpakita ug mu-contact kanila.
