BUTUAN CITY – Gibana-banang mukabat sa 165-mil pesos nga kantidad sa 14-gramos nga suspected shabu ang nakumpiska sa hini-usang pwersa sa Butuan City Police Station kon BCPS-2 og sa Philipine Drug Enforcement Agency kon PDEA atol sa ilang gilusad nga buy bust operation nga natapos kaganinang alas-tres sa kaadlawon.
Ang maong ginadiling druga uban sa mga drug paraphernalia, nakuha gikan sa subject sa operasyon nga si Arif Merka Dangcugan, 23-anyos, ulitawo og residente sa Brgy. Saduk, Marawi City, lalawigan sa Lanao del Sur.
Sigon ni SPO2 Jun Pagula, kagahapon pa sa udto nila gisundan si Jabbar hangtud nga ila na kining nasigti kaganinang kaadlawon sa Brgy. Doongan ning siyudad sa Butuan dihang mihatag kini og suspected shabu human natunulan og usa ka libo ka pesos nga marked money.
Gikan matud pa sa Kibungsod, Misamis Oriental nila gisundan ang suspek hangtud nga milampos ang ilang paghupo-hupo.
Nasayrang nadakpan na nila ang suspek sa ilang anti-illegal drug operations niadtong Agusto ning mi-aging tuig apan naka-ikyas kini og hangtud karon, padayon gihapon sa iyang ilegal nga kalihukan.
Nasayrang tungod sa hugot nga kampanya sa kapulisan, dili na mudawat og cash nga itunol lang ang suspek hinungdan nga migamit usab sila og courier nga maoy ilang gigamit pagpadala og 16-mil pesos ngadto sa suspek nga apil sa ilang gamitong ebidensya. (Beth Ruiz)
