BUTUAN CITY – Posibleng ipagawas na ang bakuna kontra African Swine Fever (ASF) sa mas daling panahon tungod sa pagtinabangay sa Food and Drug Administration (FDA) ug sa Department of Agriculture (DA) aron lang matumbok kung unsa ka-epektibo ang bakuna nga gamiton aron batukan ang ASF nga dugay nang mi-atake sa mga babuyan sa nasud.
Sigon ni Agriculture Secretary Francisco Tiu Laurel, posibleng sa sunod duha ka semana, aprubahan na sa FDA ang commercial trial sa bakuna kontra ASF. Human sa commercial trial, sundan kini sa commercial distribution.
Sigon sa kalihim, nahimong epektibo ang bakuna sa Vietnam ug mala-umon ang DA nga epektibo usab kini sa pagsanta sa ASF sa nasud.
Subli usab nga gipamugos sa kalihim ang panawagang bantayan ang mga manulod nga imported goods sa Pilipinas aron mapugngan ang paglapad pa sa kaso sa ASF ug uban pang sakit sa mga hayop.
