BUTUAN CITY- Minghimo og kasaysayan ang usa ka 25 anyos nga si Ana Victoria Espino de Santiago gikan sa Mexico human giila nga unang tawo sa kalibutan nga adunay Down syndrome nga nakagradwar sa kursong Abogasya ug kwalipikado nang mopraktis isip abogado.
Human sa lima ka tuig nga paningkamot, malampuson niyang nahuman ang iyang Law degree sa Universidad Autónoma de Zacatecas, diin nalampasan niini ang daghang hagit lakip ang pagpasar sa entrance examination ug pagpadayon sa iyang pagtuon uban sa suporta sa usa ka shadow professor.
Gawas sa iyang propesyon, aktibo usab kining tigpasiugda sa katungod sa mga adunay kapansanan pinaagi sa pag-apil sa mga legislative forum ug pagpasiugda sa inklusibong katilingban, samtang nailhan usab kini isip usa ka artista nga adunay mga obrang gipasundayag sa nagkadaiyang bahin sa Mexico.
Ang iyang kalampusan nagpakita nga ang Down syndrome dili babag sa pagkab-ot sa mga damgo kon adunay determinasyon, oportunidad, ug suporta gikan sa komunidad
