BUTUAN CITY – Malampusong nakabalik sa kalibutan ang Artemis II human sa makasaysayang splashdown sa kadagatan duol sa San Diego, California.
Naa sulod sa Integrity Capsule ang tibuok team human sa ilang misyon sa bulan.
Ang upat ka astronaut mao sila: Reid Wiseman, Victor Glover, Christina Koch, ug Jeremy Hansen, human sa siyam ka adlaw nga pagbiyahe palibot sa bulan, nga nagtimaan sa bag-ong yugto sa programa sa NASA Artemis.
Gikan sa tulin nga 23,000 mph (37,000 km/h) sa pagsulod sa atmosphere, hinay-hinay nga napakunhod ang dagan sa kapsula pinaagi sa multi-stage parachute system hangtod sa 20–30 km/h sa wala pa kini mitugpa sa dagat.
Dali nga miresponde ang U.S. Navy gikan sa USS John P. Murtha aron sugaton ang crew alang sa medikal nga eksaminasyon ug recovery operations.
Ang misyon malampuson nga nakab-ot ang tumong sa pagsulay sa mga sistema sa Orion spacecraft ug pag-andam sa sunod nga lakang padulong sa pagbalik sa tawo sa bulan.
Sa kinatibuk-an, milapas sa 400,000 kilometro ang gilay-on nga nalupad sa Artemis II, ug nakahatag og mga hulagway gikan sa lunar orbit, lakip ang talan-awon sa “Earthset.”
Ang malampusong pagbalik sa Artemis II usa ka simbolo sa bag-ong paglaum sa usa ka bag-ong panahon sa eksplorasyon sa kawanangan—usa ka pamatuod nga andam na usab ang katawhan sa pagtunob pag-usab sa bulan.
