BUTUAN CITY – Sa unang higayon, naka-abot ang air patrol sa pwersa sa Pilipinas ka-uban ang Amerika ug Japan sa Bashi Channel, usa ka estratehikong gawasanan nga nagtunga sa Mavulis Island sa Batanes gikan sa contested island nga Taiwan.
Ang maong air patrol kabahin sa ika-15 nga multilateral maritime cooperative activity (MMCA) nga gihimo sa Armed Forces of the Philippines (AFP), US Indo-Pacific Command ug Japan Maritime Self-Defense Force sa West Philippine Sea gikan niadtong Pebrero 20 hangtud kagahapon.
Dinhi gipadala sa pwersa sa Pilipinas ang nagkada-iyang naval ug air assets apil na ang BRP Antonio Luna sa Philippine Navy, FA-50 fighter jets sa Philippine Air Force, C-208B, A-29 Super Tucano ug Sokol Search and Rescue helicopter.
Gi-deploy usab sa Philippine Coast Guard (PCG) ang BRP Gabriela Silang nga nagpakita og whole-of-nation approach aron protektahan ang maritime domain sa nasud.
Gipadala usab sa Amerika ang USS Dewey ug P-8A Poseidon maritime patrol aircraft samtang ang Japan, nagpadala sa ilang P-3 Orion maritime patrol aircraft.
Nasipatan usab ang mga barkong panggiyera sa Chinese Navy sa daghang higayon karong semanaha duol sa naval assets sa Pilipinas ug Amerika nga nagpatrolya sa WPS atol sa maong maritime cooperative activity.
