BUTUAN CITY- Mas mapalig-on pa ang serbisyong panglawas sa Victorias City sa Negros Occidental human magamit na sa Victorias City Primary Care Facility ang bag-ong Tricog VCardia 12-channel electrocardiogram kon ECG machine nga adunay artificial intelligence kon AI-powered remote cardiac care technology.
Ang maong ekipo, nga donasyon sa Elan Vita Diagnostic Solutions, makapadala gilayon og ECG data ngadto sa Tricog Cloud diin susihon kini sa AI ug beripikahon sa mga cardiologist, aron mahatag ang opisyal nga resulta sulod lamang sa pipila ka minuto.
Sumala ni Mayor Abelardo Bantug III, ang teknolohiya makatabang sa mas paspas ug mas tukmang pag-diagnose sa mga pasyente, makapamubo sa oras sa paghulat, ug makapakunhod sa panginahanglan nga mobiyahe pa ngadto sa mga tertiary hospital alang sa batakang cardiac screening.
Ang Victorias City usab ang unang lokal nga kagamhanan sa Negros Island Region nga migamit sa maong AI-powered remote ECG system pinaagi sa pakigtimbayayong sa pribadong sektor.
