BUTUAN CITY – Nagpagawas ang Federal Bureau of Investigation (FBI) og hangtud $25,000 kon kapin kon kulang P1.4 million nga reward money bugti sa impormasyong magtudlo sa nahimutnagan sa usa ka Pilipinong akusado sa crimes against children.
Sigon sa FBI Dallas Field Office, si Austin Jan Sy Yatco, wanted tungod sa pagkalambigit sa online exploitation sa mga menor-de-edad gikan niadtong tuig 2019 hangtud 2021 kansa parte sa usa ka network nga migamit sa mga gaming ug social media platforms aron makig-alayon sa mga biktima.
Nasayrang gipagawas ang federal arrest warrant ni Yatco niadtong Enero 23, ning tuiga gikan sa United States District Court for the Eastern District of New York alang sa mga kasong conspiracy to produce ug conspiracy to receive and distribute child sexual abuse material nga iyang gi-atubang.
Base sa imbestigasyon, konektado matud pa si Yatco sa usa ka online group nga “Greggy’s Cult,” kansa nalambigit matud pa sa pagpamugos sa mga menor de edad nga muhimo og mga explicit materials kansa sa ngadto-ngadto, ipakaylap sa grupo.
Nagpuyo kaniadto si Yatco sa Plano, Texas, apan wala na sa maong lugar ug posibleng ania karon sa Pilipinas nagtago.
Padayon usab ang panawagan sa mga otoridad ngadto sa publiko nga mutabang sa imbestigasyon pinaagi sa paghatag og bisan unsa mang impormasyon nga makatabang sa pagtumbok sa nahimutangan sa akusado.
