BUTUAN CITY – Luwas ang tanang pasahero gikan sa gi-divert nga Air Niugini Boeing 767-300 human kini nag-emergency landing sa Davao International Airport kaganinang alas-12 sa tungang gabii.
Nasayrang gikan sa Hong Kong ug padulong unta sa Port Moresby sa Papua New Guinea ang maong eroplano, apan nag-emergency landing sa Davao City kondiin daling gitaud ang emergency slides ug gi-deploy ang mga emergency response vehicles ngadto sa eroplano nga may naghakot sa mga pasahero.
Base sa inisyal nga pgpanubay sa Civil Aviation Authority of the Philippines (CAAP), namatikdan matud pa sa mga piloto ang fire warning sa right engine sa Boeing 767-300ER samtang nagbiyahe rason nga daling gisunod sa flight crews ang standard safety procedures ug gipalong ang apektadong makina sa wala pa kini na-divert paingon sa Davao.
Gikumpirma sab sa airline nga luwas ang tanang pasahero ug crew nga sakay sa eroplano ug gitabangan na sa Air Niugini ang mga pasahero alang sa temporary accommodation sa Davao City samtang gihikay ang ilang padayong biyahe paingon sa Port Moresby.












