-- ADVERTISEMENT --

BUTUAN CITY – Gila-umang mudagan pag-usab si El Salvador President Nayib Bukele alang sa ikatulong sunod-sunod nga termino sa 2027 presidential elections nga ipahigayon sa Pebrero 28.

Si Bukele, nga nag-edad og 45 anyos, mao ang nagtukod ug lider sa Nuevas Ideas Party nga nagkontrol sa Legislative Assembly sa nasud.

Gitugotan ang iyang ikatulong kandidatura human gi-amenda sa Legislative Assembly niadtong 2025 ang Konstitusyon aron wagtangon ang limitasyon sa presidential term ug lugwayan gikan lima ngadto sa unom ka tuig ang termino sa presidente.

Nailhan ang administrasyon ni Bukele tungod sa hugot nga kampanya batok sa mga criminal gangs nga nakatampo sa pagkunhod sa krimen ug nakadawat og dakong suporta gikan sa publiko.

Apan gisaway usab ang iyang administrasyon tungod sa mga alegasyon sa paglapas sa tawhanong katungod. Sukad sa pagdeklara sa state of emergency niadtong 2022, gihatagan og mas lapad nga gahum ang kapulisan sa pagdakop sa mga suspetsado, diin adunay mga tawo nga gidetine bisan walay pormal nga kaso batok kanila, samtang gipahigayon usab ang dinagkong mga husay diin gatusan ka akusado ang gihukman.

-- ADVERTISEMENT --