-- ADVERTISEMENT --

BUTUAN CITY – Gipasabot ni Miss Universe Philippines 2026 Bea Millan-Windorski ang kamahinungdanon sa sampaguita isip simbolo sa kulturang Pilipino ug timaan sa kinasing-kasing nga pagdawat ug pag-abiabi sa isi’g katawo.

Sa iyang social media post nga giubanan sa mga litrato, gipaambit ni Windorski nga ang pagsugat sa usa ka tawo pinaagi sa paghatag og sampaguita dili lamang yano nga paghatag og bulak o garland, kondili usa usab ka tradisyon nga nagpakita sa pagrespeto, pagpasidungog ug paghatag bili sa kulturang Pilipino.

Ang maong konsepto sa sampaguita iyang gipakita pinaagi sa iyang sinina nga gidisenyo ni Jot Losa alang sa usa ka panihapon sa Puerto Rico. Sumala sa beauty queen, ang nasudnong bulak sa Pilipinas nagsimbolo sa kaputli, pagkamapa-ubsanon, pagtahod ug kinasingkasing nga pagkama-abi-abihon.

Samtang, nagpadayon ang pagpangandam ni Windorski alang sa ika-75 nga Miss Universe pageant diin iyang dad-on ang bandila sa Pilipinas.

Gikatakdang ipahigayon ang grand coronation night sa Nobyembre 24 sa Puerto Rico, o Nobyembre 25 sa oras sa Pilipinas, diin paningkamutan niyang makuha ang ikalimang korona sa nasud sa maong internasyonal nga kompetisyon.

-- ADVERTISEMENT --