-- ADVERTISEMENT --

BUTUAN CITY- Mopadayon sa ikatulong sunod-sunod nga semana ang pag-ubos sa presyo sa mga produktong petrolyo sa Pilipinas, sumala sa Department of Energy kon DOE, diin sugdan ugmang adlawa Martes, Nobyembre 17, ang rollback nga P3.80 kada litro sa diesel, P1.50 sa gasolina, ug P5.80 sa kerosene.

Sumala pa Departamento, ang pagkunhod sa presyo nalambigit sa pag-usab sa kahimtang sa suplay sa lana sa tibuok kalibotan, human nagkadaghan ang oil shipments gikan sa Gulf region nga miresulta sa sobra nga suplay sa merkado niadtong Oktubre, unang higayon sukad nagsugod ang gubat sa Iran.

Sumala sa International Energy Agency kon IEA, misaka pag-usab ang suplay sa lana tungod sa pagbalik sa operasyon sa mga barko kinsa ming-byahe sa Strait of Hormuz ubos sa escort sa Estados Unidos, bisan pa sa padayon nga pag-atake sa mga tanker.

Gilauman usab sa IEA nga mokunhod sa 2.7 milyon ka bariles kada adlaw ang pangkalibotang panginahanglan sa lana karong tuiga tungod sa nagpabiling taas nga presyo sa krudo, pagpalapad sa paggamit sa mga de-koryenteng sakyanan, ug mas episyenteng paggamit sa gasolina.