BUTUAN CITY – Nagpagawas na og extradition warrants of arrest ug hold departure orders (HDO) ang Makati City Regional Trial Court Branch 145 batok nila Pastor Apollo Quiboloy, Teresita Dandan ug Helen Panilag.
May kalabutan kini sa mga seryosong kasong ilang gi-atubang sa Estados Unidos nga gilangkuban sa sex trafficking pinaagi sa pwersa, pagpanglimbong ug pagpamugos, sex trafficking sa mga menor de edad, ug pagpamalhin og dagkong kantidad sa kwarta.
Ang mga akusasyon, naggikan sa indictment nga gipagawas sa US District Court for the Central District of California niadtong Nobyembre 2021, nga gisundan sa pagpagawas sa wanted poster sa Federal Bureau of Investigation kon FBI batok kang Quiboloy niadtong Enero 2022.
Gawas sa mga kaso sa Estados Unidos, nag-atubang usab si Quiboloy og lahi nga mga kaso sa Pilipinas, lakip ang qualified human trafficking ug child abuse nga padayong gilimod dayong butyag nga biktima siya sa politikal nga pagpanglutos.
Gikumpirma sa Department of Justice ang pagpagawas sa mga warrant ug HDO human sa pormal nga pagpasaka sa Estados Unidos sa extradition petition niadtong Nobyembre 9, 2023.
Gika-ingong nakakita ang korte og probable cause o igo nga basehan nga ang tulo mao ang mga indibidwal nga ginganlan sa mga kaso sa Estados Unidos ug nga ang ilang mga kasong gi-atubang sakop sa extradition proceedings.
