BUTUAN CITY – Sugdan na karung adlawa ang kalihukan sa mga kabatan-onan isip pagsupak sa Pax Silica og ang gilaumang presensiya ni United States President Donald Trump.
Sigon ni Francesca Duran, Convenor-Youth Against Pax Silica nga sugdan kini pinaagi sa National Youth Day of Action karung adlawa diin gibana-banang muabot sa 10-mil ka mga kabatan-onan sa nagkadaiyang panig sa nasud ang mohimo og protesta.
Gikumpirma ni Duran nga muabot sa Manila karung adlawa ang mga Aeta kauban ang mga mag-uuma gikan sa Palawan og ubang gikan sa indigenous Community diin magtapok kini sa UP Diliman. Sundan kini sa himoong protesta karung Nobyembre 16 sa US Embassy samtang pagka-ugma usab sa PICC diin himoon ang ASEAN Summit og sa Nobyembre 18 sa Mendiola.
Pasabot pa ni Duran nga hugot nga gisupak sa kabatan-onan ang Pax Silica tungod sa kadaot nga mahatag niini sa kumunidad dayung pagbarug nga kung dunay maapektuhan sa gitinguhang kalamboan, dili kini makonsiderang paglambo.
Kini tungod kay gawas nga dunay mga katutubo nga mapalayas sa ilang yutang gi-ugmad, makuhaan pa og panginabuhian ang mga Filipino tungod kay pipila lang ang makapahimulos sa maong proyekto.
Gipadayag usab sa grupo ang posibleng dakong konsumo sa tubig ug kuryente sa mga high-tech industrial facilities ug AI infrastructure, ingon man ang pagdumala sa industriyal nga basura.
Gawas sa Pax Silica, hugot usab nga gisupak sa grupo ang presensiya ni Trump tungod sa polisiya sa Estados Unidos sa gubat, relasyon sa Pilipinas ug Amerika, og ang isyu sa Palestine.
Mamahimong crucial matud pa ang posisyon sa Pilipinas sa tinguhang pakig-kompetensiya sa US ngadto sa China sa hisgutanang AI.
