BUTUAN CITY- Gipahibalo na ang detalye sa haya ug lubong sa mintaliwang komedyante ug singer nga si Ate Gay, kansang public viewing gisugdan niadtong Nobyembre 4 ug magpadayon hangtod Nobyembre 9 sa Forest Lake, Biñan, Laguna, diin bukas kini sa publiko gikan alas-8 sa buntag hangtod alas-3 sa hapon, samtang gitugotan usab ang pamilya, suod nga mga paryente, higala ug mga kauban sa trabaho sa pagbisita sa bisan unsang oras.
Gikatakdang ipahigayon ang kataposang panamilit ug paglubong niini sa Nobyembre 10, Martes. Si Ate Gay, nga giila sa iyang tinuod nga pangalan nga Gil Aducal Morales, namatay nga malinawon niadtong Nobyembre 1 samtang gilibotan sa iyang pamilya.
Niadtong Setyembre 2025, gipahibalo niini ang iyang pakigbisog batok sa kanser, samtang niadtong Oktubre 30 nakaagom kini og stroke ug nadayagnos nga adunay septic shock ug acute respiratory failure nga resulta sa pneumonia.
Nailhan si Ate Gay sa iyang pag-impersonate sa mintaliwan na usab nga National Artist nga si Nora Aunor, ug niadtong miaging bulan, nagpahigayon pa kini og gitawag nga living funeral diin gihatagan siya og pasidungog sa iyang pamilya ug mga higala samtang buhi pa.
