BUTUAN CITY – Gisuspende sa Office of the Ombudsman sulod sa unom ka bulan nga wala’y sweldo ang walo ka personnel sa Department of Public Works and Highways (DPWH) tungod sa gika-ingong mga iregularidad sa pagpatuman sa mga proyekto sa imprastraktura sa Surigao del Norte.
Naila ang mga nasuspende nga sila Engr Annie Dela Vega – District Engineer sa DPWH Regional Office XI, engineers IIi nga sila Federico Gotico III; Demilyn Castrence; Quintinano Armendariz Jr. ug Edward Tinio.
Anaa pa sila Engrs II Florencio Sulana kinsa acting chief of Quality Assurance ug Ricky Arciga ug ang accountant III nga si Jerome Sulapas.
Gi-reklamo sila sa mga kasong grave misconduct, serious dishonesty and conduct prejudicial to the best interest of the service.
Lakip sa gi-imbestigahan sa Ombudsman ang usa ka P80.61-million Mahayhay–Tuburan Road Project sa lungsod sa Del Carmen nga gihatag sa Boometrix Development Corporation.
Base sa imbestigasyon, gi-report nga 100 porsiyento nang nahuman ang proyekto ug nabayran na ang kontraktor, apan 65 hangtod 70 porsiyento pa lamang diay ang aktuwal nga accomplishment niini.
Gipasabot sa Ombudsman nga gihimo ang preventive suspension aron malikayan nga magamit sa mga respondents ang ilang posisyon sa pag-impluwensya sa imbestigasyon dayong klaro nga administratibong lakang pa lamang kini ug wala nagpasabot nga napamatud-an nang sad-an sila.
