BUTUAN CITY- Andam na ang kampo sa mga biktima sa drug war nga ipa-atubang ang ilang mga ebidensya ug witnesses sa pagtaral kang kanhi President Rodrigo Duterte sa International Criminal Court (ICC) sa Nobyembre 30.
Gipadayag ni Atty. Neri Colmenares, legal counsel sa mga pamilya sa mga biktima sa extrajudicial killings, nga ang status conference karung adlawa Nobyembre 2 ang kataposang higayon aron plantsahon ang mga detalye sa trial.
Naka-andam na ang ilang opening statements ug mga ebidensyang magpamatuod sa nahimong papel ni Duterte ug sa epekto sa kampanya batok sa droga sa kinabuhi sa mga biktima.
Gibana-banang anaa sa 60 hangtud 70 ka witnesses ang posibleng ipa-atubang sa prosecution samtang adunay 52 ka stipulations pa ang posibleng sabutan sa duha ka kampo.
Bisan paman adunay limitasyon sa budget ang legal team alang sa pagbyahe sa Netherlands, gisiguro ni Colmenares nga aduna gihapon silay opisyal nga representante sa hearing.
Gihatagan og ginbug-aton usab sa abogado nga base sa independent medical assessment, ang kanhi Presidente fit nga mo-atubang sa pagtaral taliwa sa posibleng pag-waive niini sa pagtambong sa status conference.
