BUTUAN CITY – Gitudlong posibleng responsable sa dakong cyberattack batok sa Binance – ang pinakadakong cryptocurrency exchange sa kalibotan, ang Lazarus Group, usa ka hacking unit nga gisuportahan sa gobyerno sa North Korea, kondiin mikabat sa 6.3 billion dollars ang kantidad sa gikawat nga pondo.
Sumala sa duha ka dagkong blockchain analytics firms nga TRM Labs ug Chainalysis, lig-on ang ilang mga impormasyon nga nagpunting sa Lazarus Group, nga nailhan usab sa ngalan nga TraderTraitor, isip posibleng responsable sa maong cyberattack.
Nasayrang dili kini ang unang higayon nga nalambigit ang North Korea sa dagkong cybercrime, kondiin gi-akusahan sa mga eksperto ang gobyerno ni North Korean leader Kim Jong Un nga naggamit sa hacking ug uban pang cybercrimes aron makapundo sa ilang mga kalihokan kansa gilimod usab sa Pyongyan.
Mahinumdomang niadtong 2014, gipunting usab sa usa ka dakong cyberattack ang Sony Pictures, ang Hollywood film studio nga naghimo sa pelikulang The Interview, nga nagpakita sa usa ka laraw sa pagpatay kang Kim Jong Un.
Tungod sa maong hacking incident, migawas sa publiko ang liboan ka pribado ug maka-uulaw nga mga email nga naglangkob sa mga panag-istoryahanay sa mga opisyal ug ehekutibo sa kompanya.
Ang North Korea gikonsiderang usa sa pinakakabus nga nasud sa kalibotan, diin hugot usab nga gipugngan ang pag-access sa internet sa kadaghanan sa mga lumulupyo niini.
