BUTUAN CITY- Patay ang upat ka wala pa mailhing mga lalaki human gipamusil ang gisakyan nilang sakyanan sa Barangay Tulunan, Datu Abdullah Sangki, Maguindanao del Sur, Lunes sa hapon, Oktubre 26, 2026.
Base sa inisyal nga imbestigasyon sa kapulisan, sakay ang mga biktima sa usa ka silver nga Toyota Vios nga adunay plaka XST 6 dihang nahitabo ang pagpamusil pasado ala-1:12 sa hapon.
Gihulagway ang mga biktima nga pulos mga hamtong na, lakip na ang gituohang drayber sa sakyanan nga nagsul-ob og puti nga t-shirt ug itom nga pantalon.
Narekober sa crime scene ang mga basyo sa bala nga gituohang gikan sa mga armas nga naggamit og 5.56mm ug 9mm nga bala.
Kinahanglan pa kining ipaubos sa eksaminasyon aron makumpirma ang kalibre sa mga basyo.
Padayon pang giila sa mga awtoridad ang mga biktima ug suspek, lakip na ang motibo sa krimen.
Naghimo na og inisyal nga imbestigasyon ang Datu Abdullah Sangki Municipal Police Station ug gilusad ang dragnet operations aron mailhan ug madakpan ang mga suspek nga mikalagiw human sa pagpamusil.
