BUTUAN CITY – Gibana-bana nga mu-abot sa 110 ka mga panimalay ang na-apektuhan sa dakong sunog nga mi-ulbo sa Barangay Labogon, Mandaue City, Cebu niadtong Martes sa hapon.
Sa pakighinabi sa Bombo Radyo Cebu, gipadayag ni Dr. Mike Pialago, hepe sa Mandaue City Welfare Services, nangandam na ang lokal nga kagamhanan alang sa paghatag og pinansyal nga tabang ug pagkaon alang sa mga pamilyang naapektuhan sa sunog.
Base sa inisyal nga ebalwasyon sa City Social Welfare and Development Office o CSWDO, mokabat sa 98 ka mga pamilya ang unang natala nga posibleng naapektuhan sa insidente.
Magpahigayon usab ang ilang buhatan og proseso sa beripikasyon aron makumpirma ang mga kwalipikadong benepisyaryo ug matino kung kinsa sa mga biktima, ang mga tag-iya sa balay ug kinsa ang mga nangabang lamang.
Ubos sa programa sa ayuda sa siyudad, 10-mil pesos ang madawat sa matag tag-iya sa balay nga naapektuhan sa sunog, samtang 5-mil pesos alang sa matag nangabang. Gilugwayan usab gikan sa tulo ngadto sa lima ka adlaw ang pag-apod-apod og pagkaon sa mga biktima human gi-aprobahan sa mayor ang hangyo sa barangay.
Sumala sa Bureau of Fire Protection o BFP, mikaylap ang sunog sa gilapdon nga mokabat sa 3,000 square meters ug nagresulta sa gibanabanang 1.5 milyon pesos nga kadaot.
