BUTUAN CITY – Patay na sa edad nga 34-anyos ang Australian model ug swimwear designer nga si Sahara Ray, base na sa pagkumpirma sa iyang mga kapamilya apan wala na sila maghatag og dugang nga detalye kabahin sa hinungdan sa iyang kamatayon.
Na-ilhan si Ray isip usa ka modelo ug social media influencer ug misamot ang pagdaghan sa iyang mga sumusunod sa social media human niya gilusad ang kaugalingong swimwear brand nga gitawag og Sahara Ray Swim.
Niadtong 2016, nahimong sentro sa diskusyon sa publiko ang iyang gika-ingong relasyon sa Canadian singer nga si Justin Bieber human silang nakitang nagbakasyon nga magka-uban sa Hawaii.
Nahisgutan usab sa media ang iyang relasyon sa Australian singer nga si Cody Simpson.
Si Ray anak sa gikat nga Australian surfer nga si Tony Ray. Sa iyang pagkabata, kanunay siyang mouban sa mga kompetisyon sa iyang amahan sa California, Australia ug Hawaii, diin nagsugod ang iyang pagkahibalo sa kalibotan sa surfing ug pagka-modelo.
Niadtong 2024, gibutyag ni Ray nga nakigbisog siya batok sa Guillain-Barré syndrome, usa ka talagsaong neurological disorder kondiin atakehon sa immune system ang mga nerves sa lawas, nga mahimong mosangpot sa kaluya ug pagkaparalisado sa pipila ka bahin sa lawas.
Matod sa mga report, ang maong kondisyon nalambigit sa iyang naangkon nga mga problema sa panglawas human sa usa ka aksidente sa sakyanan.
