BUTUAN CITY – Mi-abot sa 153 ka mga tawo ang patay sa nahitabong drone strike sa Abyei, usa ka teritoryo sa utlanan nga gi-ilugan sa Sudan ug South Sudan.
Sigon ni Yohanna Akol Ngor, caretaker information administrator sa Abyei, ang militar sa Sudan maoy gi-akusahan nga responsable sa pag-atake sa Amiet Market.
Gika-ingong migamit ang militar og mga drones aron targeton ang mga fuel tanker nga gikan sa South Sudan ug padulong unta sa paramilitary Rapid Support Forces o RSF.
Kadaghanan sa mga namatay, mga miyembro matud pa sa RSF ug mga tawo nga nalambigit sa pag-smuggle sa lana.
Daling gikondena sa Foreign Ministry sa South Sudan ang maong pag-atake ug gi-akusahan ang militar sa Sudan nga responsable usab sa mga pag-atake sa nagkalain-laing bahin sa ilang nasod nga miresulta sa pagkamatay sa daghang mga sibilyan.
Ang Abyei dugay nang gi-awayan nga lugar tali sa Sudan ug South Sudan, ug ang nagpadayon nga tensiyon sa maong rehiyon nalambigit usab sa mas lapad nga panagbangi tali sa Sudanese Armed Forces ug RSF.
