BUTUAN CITY – Gipamugos ni Iloilo First District Representative Janette Garin nga daw gihimo na karong politikal ang isyu sa Dengvaxia, human sa desisyon sa Sandiganbayan nga nagpawala’y sala kaniya ug sa iyang mga ka-ubanang akusado gikan sa mga kaso batok kanila.
May kalabutan kini sa kasong graft ug technical malversation nga iyang gi-tubang may kalabotan sa kontrobersyal nga P3.55-bilyon nga procurement sa Dengvaxia vaccines niadtong 2015 dihang siya pa ang kalihim sa Department of Health kon DOH.
Gipadayag ni Garin nga gihimo lamang nga panakip-butas sa mga anti-vaccine groups ug sa iyang mga ka-atbang sa politika ang isyu matag-adunay palpak o kadudahang pagpalit og mga tambal sa Department of Health.
Giklaro sa magbabalaud nga napamatud-an sa korte nga wala’y bisan unsang pondo nga napadulong sa iyang bulsa, samtang mibarog siya uban sa kapin 20 ka mga siyentista aron depensahan ang integridad sa siyensiya ug ang mga opisyal nga dokumento nga gigamit sa ilang depensa.
Gipamugos usab niya nga ang maong isyu adunay dakong epekto dili lamang kaniya, kondili apil usab sa mga doktor, tigdukiduki ug mga eksperto sa public health nga padayon nga nag-atubang sa hagit sa pagkaylap sa sayop o misleading nga impormasyon.
Tungod niini, nanawagan si Garin sa komunidad sa mga eksperto nga dili mawad-an og paglaum ug ipadayon ang ilang katungdanan aron mapasig-uli ang pagsalig sa publiko sa mga bakuna ug sa public health.
