BUTUAN CITY- Nagdagsa ang mga isda sa baybayon sa Barangay Mabua, Surigao City, kaganiha Biyernes sa may alas 10:30 ang takna sa buntag, human nasaksihan sa mga residente ang daghang isda nga nagpadaplin sa kabaybayonan.
Sumala ni Lenie Ariar, residente sa maong barangay, alas-10:30 sa buntag dihang nagmiting kini uban sa mga tag-iya sa mga cottage sa maong lugar, kalit silang nakadungog og singgit gikan sa usa ka cottage owner nga adunay daghang isda sa baybayon, hinungdan nga nabungkag ang ilang miting ug midagan padulong sa daplin sa dagat.
Sigon pa ni Ariar, ang mga isdang “tamarong” giingong gigukod sa dagkong isda hinungdan nga nangdaplin kini sa kabaybayonan, samtang sa miaging adlaw nakasaksi usab ang mga residente og pagdagsa sa mga isdang tamban. Gipadayag usab niini, nga gikan sa Purok 6, mikatap ang pagdagsa sa isda ngadto sa ubang purok hangtod Purok 1, diin nakakuha usab ang mga managat og dagkong isda nga gitawag og “buktot.”
Usa ka abtik nga mangisdaay ang unang nakakuha sa dagkong isda, samtang gibanabana usab niini nga mokabat sa 15 ka kilo ang nakuhang “tamarong” sa Purok 6 lamang, wala pay labot sa ubang purok. Sigon ni Ariar, base sa nakuha niini nga impormasyon kaniadto pa adunay susamang pagdagsa sa isda sa Mabua, ug base sa iyang pakighinabi sa mga managat, mibalik usab ang maong panghitabo karong higayona.
