BUTUAN CITY – Gipahibalo sa usa sa pinakadakong K-pop groups sa kalibotan nga Stray Kids nga dili sila magsumite og mga kanta alang sa 2027 Grammy Awards, sama sa gihimo usab sa BTS.
Kini human gipa-ila ang usa ka kontrobersyal nga bag-ong kategorya alang sa Asian pop music, nga gikabalak-an sa mga kritiko nga mahimong makapahimulag o makapahimo nga lahi nga kategoriya, ang mga genre sama sa K-pop ug J-pop.
Niadtong Hulyo, gipahibalo sa BTS nga dili sila mosubmite og mga kanta alang sa konsiderasyon sa bisan unsang kategorya sa Grammy Awards. Matud sa grupo, gusto nila nga ang ilang musika madungog ug higugmaon tungod sa iyang kaugalingong kalidad, dili tungod sa rehiyon o pinulongan diin kini naggikan.
Karon, misunod na usab ang Stray Kids, nga bag-o lang nakab-ot ang ilang ikasiyam nga number one album sa Estados Unidos.
Sa wala pa kini nga pahibalo, wala usab direktang motubag ang Stray Kids sa mga pangutana bahin sa ilang pag-apil sa Grammy Awards.
Sigon ni Hwang Hyun-jin, dili nila target nga ang mga resulta sa awards o mga rekord sa industriya mao ang katuyuan sa paghimo nila og mga kanta tungod kay ang ilang prayoridad mao man ang kalipay ug katagbawan sa ilang mga fans.
Gilauman nga mahimong dakong hagit alang sa Recording Academy, ang organisasyong nagdumala sa Grammy Awards, ang dili pag-apil sa duha ka dagkong K-pop groups nga BTS ug Stray Kids.
