BUTUAN CITY- Miabot na sa Moscow, Russia, ang duha ka top-envoy ni US President Donald Trump nga sila Steve Witkoff ug Jared Kushner aron makigpulong sa mga opisyal sa Russia isip kabahin sa paningkamot nga mapadali ang negosasyon alang sa pagtapos sa gubat sa Ukraine.
Gilauman nga makigkita sila kang Russian President Vladimir Putin sa dili pa sila mobiyahe paingon sa Kyiv sa karung aldawa Domingo alang sa mga panaghisgot uban kang Ukrainian President Volodymyr Zelensky. Sumala sa state media sa Russia, gimando ni Putin ang tulo ka adlaw nga paghunong sa mga pag-atake batok sa Kyiv atol sa pagbisita sa mga envoy sa US.
Sigon ni Trump, nagdala sila og proposal alang sa pagtapos sa gubat, apan wala pa makahatag og dakong kalampusan ang miaging mga paningkamot sa US ug mga kaalyado niini sa pagpangita og kasabutan sa kalinaw. Samtang, sumala ni Zelensky, giatake sa Russia ang mga airport sa Kyiv ug Boryspil atol sa usa ka gabii, kung asa iyang gihulagway isip “demonstrative” strikes, samtang giandam ang posibilidad sa pagbiyahe sa mga envoy sa US ngadto sa Ukraine.
Gisirado gihapon ang airspace sa Ukraine sukad sa pagsugod sa full-scale invasion sa Russia niadtong Pebrero 2022. Padayon usab ang pag-uswag sa mga pag-atake sa kahanginan sa duha ka nasod, samtang nagpabiling lalis ang mga isyu sama sa teritoryo ug security guarantees alang sa Ukraine.
